Makinë me një apo makinë me dy timonë, si do të vendosin shqiptarët për zgjedhjet e ardhshme. Këto janë replikat e shpeshta të këtyre ditëve të fundit mes socialistëve dhe demokratëve.
Gjithçka nisi me një deklaratë të ish-ministrit të Brendshëm Saimir Tahiri dhe Kryebashkiakut Erion Veliaj se PS-ja kërkon që të qeverisë e vetme në katërvjeçarin e ardhshëm.
Pas kësaj dje reagoi kreu i LSI-së Petrit Vasili, i cili e quajti këtë një tahma të madhe të socialistëve për të qeverisur vetëm.
Ndërsa Tahiri ka replikuar sërish. Nga një takim me banorë të njësisë numër 7 dhe 11, ai tha se se di pse Vasili e sheh si tahma dhe jo si një përgjegjësi.
“Dëgjova Petrit Vasilin që thoshte se është tahma e madhe të imagjinosh një makinë me një timon. Unë nuk e di pse i shkon mendja te tahmaja në fakt. Unë e quaj përgjegjësi, atij i shkon mendja te tahmaja, është puna e vet. Por të kesh mundësinë të qeverisësh këtë vend për shqiptarët, pa i zënë sytë me sherre, me shamata, nuk është tahma, është përgjegjësi”- tha Tahiri.
Sipas tij, “kjo është përgjegjësia jonë, e Partisë Socialiste dhe e Edi Ramës përballë çdo shqiptari që me të drejtë kërkon më shumë punë prej nesh”, theksoi Tahiri.
Sipas Saimir Tahirit gjatë katër viteve të qeverisjes ka pasur shumë shkopinj nën rrota dhe për këtë Partia Socialiste kandidon në zgjedhje me aleatin e vetëm, qytetarët e Shqipërisë. (E.K/SHUPLAKA)
Discussion about this post