Tajlanda ka akuzuar sërish Kamboxhian për një “shkelje flagrante” të marrëveshjes së armëpushimit të arritur së fundmi, duke pretenduar se trupat kamboxhiane ndërmorën një ofensivë të dhunshme gjatë natës në zonën kufitare.
Të dy vendet kishin rënë dakord për një armëpushim që hyri në fuqi të martën, pas pesë ditësh luftime të ashpra që lanë pas vetes të paktën 43 të vrarë – përfshirë ushtarë dhe civilë – dhe detyruan më shumë se 300,000 persona të evakuohen nga zona e kufirit 800 kilometra të gjatë mes dy vendeve.
Sipas Ministrisë së Jashtme të Tajlandës, forcat e saj në provincën Sisaket u sulmuan me armë zjarri dhe granata nga trupat kamboxhiane, në një ofensivë që zgjati deri në orët e para të mëngjesit të së mërkurës. “Kjo përfaqëson një shkelje flagrante të marrëveshjes së armëpushimit”, u shpreh ministria në një deklaratë zyrtare.
Zëdhënësi i qeverisë tajlandeze, Jirayu Huangsab, konfirmoi gjithashtu përleshjet gjatë natës, por theksoi se forcat tajlandeze arritën “ta mbajnë situatën nën kontroll”, dhe se nga ora 8:00 e mëngjesit të së mërkurës, “kushtet përgjatë kufirit janë kthyer në normalitet”.
Ndërkohë, Kamboxhia ka mohuar kategorikisht çdo shkelje të armëpushimit, i cili ishte vendosur për të ndalur një nga përplasjet më serioze mes dy vendeve në dekada. Takimet midis komandantëve ushtarakë të të dyja palëve u zhvilluan të martën, duke arritur marrëveshje për mos shtim të forcave në vijën e kontaktit dhe ndalimin e çdo lëvizjeje që mund të shkaktojë keqkuptime.
