Presidenti i Skënderbeut, Ardian Takaj, ka folur në konferencën e sotme rreth zgjedhjes së trajnerit të ri, Ilir Daja, për merkaton dhe “ëndrrën e pamundur” Kaçë.
Ndër të tjera kreu i klubit korçar komentoi dhe transferimin e sulmuesit Bonifejs te Partizani.
Pse zgjodha Dajën?
“Për mua është hera e parë që ndryshoj trajnerin në mes të sezonit, por duke parë ecurinë e dy fazave të para, që nuk kanë qenë pozitive për Skënderbeun, morëm vendimin për ndryshim. Vëtë pretendimet dhe objektivi jonë janë gjithmonë titulli kampion. Kemi pasur shumë mundësi të tjera për të zgjedhur, por bëmë zgjedhjen që e konsiderojmë më të mirën për vazhdimësinë dhe kjo zgjedhje është Ilir Daja.”
Agostineli
“E kam përsëritur edhe herë të tjera se nuk ka qenë vetëm trajneri problemi në periudhën e rezultateve negative, pasi edhe skuadra ka patur fajin e saj. I dhamë edhe një mundësi trajnerit dhe ai nuk arriti ta çonte ekipin në ato nivele që kërkonim, ndaj e pamë të arsyeshme të bënim ndryshimin. Përzgjodhëm një trajner me një eksperiencë shuëm të mirë në kampionatin shqiptar, siç është Ilir Daja dhe ndihmës i tij do të jetë Ard Mema.”
Merkato/ Ekipi ka nevojë për ndryshim
“Nuk diskutohet që ka plane për merkaton. Edhe po të kishim patur rezultate të mira prap do të bënim merkato. Jo vetëm ne, por të gjithë kanë nevojë për merkato. Ekipi ka nevojë për ndryshim. Kemi një listë të madhe me lojtarë dhe po i shohim. Edhe trajneri po i sheh sepse ka katër ditë që merret me këtë punë, pra me përzgjedhjen e lojtarëve që na duhen.”
“Ëndrra” Kaçe
“Kaçe nuk është diskutuar te Skënderbeu. Ai i përket PAOK-ut. Dëshira jonë është shumë e madhe për ta marrë, por gjërat e pamundura mbeten të tilla.”
Bonifejs
“Bonifejs ishte i Skënderbeut, por ne menduam se nuk është i nevojshëm dhe e lamë të lirë. Nuk është se fitoi duelin Partizani, e lamë ne të lirë sepse ai ishte lojtari ynë. Për menyrën se si luajmë ne e menduam kështu. Do të tregojë koha nëse ishte një zgjedhje e gabuar apo e mirë.”
Discussion about this post