Të tjera detaje zbulohen nga takimi i sotëm mes krerëve të politikës shqiptare, kryeministri Edi Rama, kreu i Kuvendit Ilir Meta, si edhe kreu i opozitës Lulzim Basha.
“Shuplaka” mëson nga burime brenda Partisë Demokratike, se asgjë nuk është arritur deri më tani. Sipas PD-së, kjo sepse kryeministri Rama nuk pranon kërkesën e tyre parësore që është krijimi i qeverisë teknike. Rama ka pranuar vetëm për shtyrjen e zgjedhjeve deri më 16 korrik, por jo për qeverinë teknike. Për këtë arsye, dy palët nuk kanë rënë dakord me njëra-tjetrën.
Sipas demokratëve, negociata del me sukses vetëm nëse arrihet qeveria teknike. Ndërsa ndryshimet në KQZ, policia dhe siguria për të mos patur shitblerje, është vetëm një opsion i kryeministrit Rama, për të zëvendësuar kushtin e demokratëve, për krijimin e një qeverie teknike.
Por me sa duket eurodeputeti David McAllister nuk ia ka dalë. Qeveria teknike mbetet kushti i panegociueshëm për momentin për demokratët, që sipas tyre maxhoranca duhet të përmbushë.
Rreth orës 19:00 të mbrëmjes së sotme, dy zyrtarët e BE-së janë takuar veç e veç me Ramën dhe Bashën. Knut Fleckentein ishte me kryeministrin Rama dhe kreun e Kuvendit Metën, ndërsa David McAllister me kreun e opozitës, Basha. (D.D/Shuplaka)
