3 prej deputetëve socialistë që do të garojnë në zgjedhjet lokale, kanë dhënë dorëheqjen sot nga mandati i tyre në Kuvend. Kështu në një foto të publikuar nga Pjerin Ndreu në rrjetet sociale, ata shihen duke pozuar në krah të Gramoz Ruçit.
“Dorezuam doreheqjet nga mandati i deputetit! Mirenjohje e Respekte per nje nga njerezit me te mire qe pata shansin te takoj ne politike. Komoditeti qe te jep Gramoz Ruci eshte mbeshtetje dhe inkurajim per te gjithe deputetet. Do na mungoje pjekuria, urtesia, drejtesia dhe korrektesa e tij model!”, shkruan Ndreu në reagimin e tij në rrjetet sociale.
Pesë deputët që largohen nga Kuvendi janë: Pjerin Ndreu, Flamur Golemi, Ilir Xhakolli, Rakip Suli dhe Nuri Belbaj.
Sipas listës për qarkun e Lezhës, Pjerin Ndreu pasohet në radhë nga Adriana Jaku, e cila renditet pas Gjetan Gjetanit, tashmë të përjashtuar nga Grupi Parlamentar i PS-së.
Aktualisht Jaku mban postin e zëvendësministres së Shëndetësisë dhe Mbrojtjes Sociale, dhe do të jetë deputetja më e re që i bashkohet Kuvendit.
Në listën e qarkut të Gjirokastrës, Flamur Golemi pasohet nga Artemis Dralo. Dralo aktualisht është zv.ministre për Europën dhe punët e Jashtme.
Ndërsa sipas listës së Korçës Ilir Xhakolli do të pasohet nga Ardit Konomi. Ky i fundit është drejtor i shërbimit spitalor në Korçë.
Sipas listës së Elbasanit, Nuri Belba, i cili do të garojë për bashkinë Përrenjas, do të pasohet nga Florenc Spaho. Spaho është anëtar i Asamblesë Kombëtare të Partisë Socialiste. Ai gjithashtu mban postin e nënsekretarit organizativ për Elbasanin.
Nga ana tjetër Eljo Hysko, kryetari i FRESSH, është ai që pason emrin e Rakip Sulit, deputet i PS-së në Tiranë. Suli do të garojë për të fituar Bashkinë e Kamzës, që prej 12 vitesh drejtohet nga Xhelal Mziu.
(E.K/FAXWEB.AL)
