Takimi i parë i Xhafajt si ministër, pret në zyrë ish-kreun e FBI-së

Ministri i ri i Punëve të Brendshme Fatmir Xhafaj, pret në takim ish-kreun e FBI-së Louis Freeh, i cili e uroi për detyrën e re.

Freeh ofroi mbështetjen e SHBA-së por edhe të FBI-së në luftën kundër krimit dhe paligjshmërisë në vend.

“Ministri i Punëve të Brendshme Fatmir Xhafaj, sot në ditën e parë të punës, zhvilloi një takim në zyrën e tij me z.Louis Freeh, një nga ekspertët më të njohur ndërkombëtare në luftën kundër krimit të organizuar dhe çështjeve të drejtësisë, ish-Drejtor i FBI-së.

Zoti Freeh uroi ministrin Xhafaj për emërimin në detyrë, si dhe ofroi mbështetjen maksimale të qeverisë së Shteteve të Bashkuara të Amerikës dhe FBI-së për forcimin e luftës kundër krimit dhe paligjshmërisë në vend.

Ata diskutuan gjerësisht për forcimin e ekspertizës së agjencive ligjzbatuese amerikane ndaj strukturave të MPB-së dhe agjencive të tjera ligjzbatuese në vend.”, thuhet në njoftimin e ministrisë. (D.D/Shuplaka)