Në kuadër të Samitit të Liderëve të Procesit të Brdo-Brijunit, ditën e sotme Presidenti Meta ka pritur në një takim Presidentin e Polonisë z.Andrzej Duda.
Pas ceremonisë së mirëseardhjes dy Presidentët zhvilluan një takim kokë më kokë, ku përpos diskutimeve, Meta ka shprehur mirënjohjen dhe besimin e tij për bashkëpunimin e vazhdueshëm mes dy vendeve.
Në mënyrë të veçantë Presidenti Meta shprehu mirënjohjen për vizitën e Presidentit Duda në Tiranë, si dhe pjesëmarrjen e tij në Samitin e Liderëve të Procesit të Brdo-Brijunit, duke e konsideruar këtë vizitë, një mesazh të qartë mbështetës për Shqipërinë dhe rajonin e Ballkanit Perëndimor në kuadër të agjendës evropiane.
Të dy krerët e shteteve ndanë mendimin se më shumë duhet bërë në drejtim të nxitjes së bashkëpunimit ekonomik, e veçanërisht në fushën e turizmit, që vlerësohet me potenciale të mëdha në rritje.
Presidenti Meta shprehu gjithashtu mirënjohjen e thellë për mbështetjen e vazhduar dhe të qartë të Polonisë për procesin e integrimit të Shqipërisë në BE, e në mënyrë të veçantë për çeljen sa më shpejt të negociatave të anëtarësimit, si dhe në kuadër të Grupit të Vishegradit.
Discussion about this post