Pas shtatë javësh ndërprerje, Rusia dhe Ukraina zhvilluan sot në Stamboll raundin e parë të bisedimeve paqësore, mes tensioneve të rritura dhe nën kërcënimin e sanksioneve të reja ndaj Moskës nga presidenti amerikan Donald Trump.
Sipas agjencisë ruse TASS, të dyja palët ranë dakord për një shkëmbim të ri të të burgosurve, ku do të përfshihen ushtarakë dhe civilë.
Ndërkohë, bisedimet që u mbajtën me ndërmjetësimin e Turqisë zgjatën më pak se një orë, sipas rrjetit publik ukrainas Suspilne, duke treguar për një klimë ende të brishtë mes dy vendeve.
Ministri i Jashtëm i Turqisë, Hakan Fidan, në hapje të takimit, u bëri thirrje delegacioneve të vazhdojnë nga dokumentet e shkëmbyera në muajin qershor, me qëllim për të ndalur sa më parë gjakderdhjen.
Delegacioni ukrainas përsëriti kërkesën për një samit mes Presidentit Volodymyr Zelensky dhe Presidentit Vladimir Putin, duke e konsideruar këtë takim si vendimtar për çdo përparim real në procesin paqësor.
