“Saga” e taksës së Rrugës së Kombit sapo ka nisur, por zhvillimet në ditët e para të vjeljes janë shumë interesante. Ndërsa qytetarët pajisen me kuponë tatimor nga firma koncesionare prej 2 ditësh, ajo çka vërehet është shuma e ndryshme e përllogaritur gjatë ditës së djeshme dhe asaj së sotme.
Bileta e kalimit të sportelit, siguruar nga faxweb.al për ditën e djeshme shënon shumën 650 lekë, ndërsa sot për të kaluar trarin e vendosur në hyrje të tunelit të Kalimashit drejtuesit e mjeteve janë detyruar të paguajnë 660 lekë, rreth 10 lekë më tepër. Ironia dhe përplasja në logjikën e administrimit të kësaj takse, u vu re qysh në fillim nga të gjithë ekspertët e ekonomisë të cilët e quajtën deri jo ligjore vendosjen e kësaj takse në euro.
Logjikisht shteti dhe sipërmarrësit e këtij koncesioni mund ta arsyetojnë lëvizjen në shumë si luhatje ditore të euros, por ndoshta shteti shqiptar po “kacafytet” me veten, po të kujtojmë lëvizjen e pak kohëve më parë të Bankës së Shqipërisë për deuroizimin e ekonomisë shqiptare. Mund të duket e tepërt dhe përforicimi i faktit se shteti shqiptar ka si monedhë të veten, lekun.
Pagesë në euro, por resto në lekë
Tarifa e vendosur për të përdorur autostradën drejt Morinës dhe tunelin e Kalimashit që në “shpalljen” e saj nga ekzekutivi shqiptar është vërejtur si tepër e lartë, me ndikim në xhepat e shqiptarëve të Kosovës dhe Shqipërisë dhe për më tepër shumë spekuluese kur diskutohet fatura e mirëmbajtjes së rrugës (së bashku me investimet e reja, për të cilat ende nuk ka projekte të sakta me preventivë të specifikuar).
Por përpos kësaj, zbatimi në terren, përveçse ka hasur në kundërshtitë e shoferëve, biznesmenëve dhe qytetarëve përtej traut, për shkak të kostos së lartë, ka krijuar dhe ngërçet e para.
Shtetasit kosovarë, biznesmenëve dhe qytetarë që lëvizin për nevojat e tyre kanë debatuar ashpër sot me sportelistët e firmës koncesionare, pasi sipas tyre: Taksa u shpall në euro, ata paguajnë me euro, ndërsa kusuri u kthehet në lekë?!
“Në përdorim euron, ndaj dhe kusurin duhet të na e kthejnë në euro, jo në lekë… Unë u dhashë 50 euro, si mund të më kthejnë kusurin në lekë për mbetjen 45 euro?”, thotë i indinjuar një prej shoferëve kosovarë.
Ndërsa qeveria shpalli dhe vuri në zbatim brenda pak ditësh një taksë të padiskutuar me grupet e interesit, shtetin fqinj, Kosovë, lojërat e fundit euro-lekë duket se i kanë çorientuar dhe më tepër qytetarët shqiptarë dhe kosovarë. Një taktikë e vjetër kjo për të futur lehtë dorën në xhepin e tjetrit… (B.S/ faxweb.al)
https://www.youtube.com/watch?time_continue=6&v=7LEaSH5mS-s
Discussion about this post