Nga marrëveshja e 18 Majit mes Ramës dhe Bashës u duk se partitë e vogla mbetën të diskriminuara. Gjithçka nisi me shmangien e tryezës së përbashkët dhe një takimi kokë më kokë mes Ramës dhe Bashës dhe më pas afatet për koalcione.
Në marrëveshjen e paraqitur dhe me shkrim nuk përcaktohej një afat i ri për koalicionet, çka do të thotë që të vegjlit e të dyja anëve do të duhet të kandidojnë të vetëm në zgjedhjet e Qershorit. Duke pasur parasysh dhe Kodin Zgjedhor në vendin tonë, një partie të vogël i duhet më shumë punë për të arritur një mandat të sigurt deputeti.
Partia Demokratike, duke qenë se shumë gjatë aksionit të saj opozitar është mbështetur te të vegjlit ka zgjedhur që një pjesë të mirë të krerëve të Partive të vogla t’i përfshijë në vende të sigurta në listën e saj për zgjedhjet e 25 Qershorit.
Agron Duka, Fatmir Mediu, Vangjel Dule, janë disa nga emrat që mendohet se do të futen në listën e Bashës. Nëse ky është vendimi final do të na duhet të presim deri nesër.
Nga ana tjetër në rradhët e të majtëve, tre aleatë të vegjël sot me në krye Petro Koçin ju bënin thirrje Partive të tjera si ajo e PDS-s dhe PSD-së që të tërhiqeshin nga gara në mënyrë që të mos dëmtonin Partinë Socialiste.
Vetë ata iu bënë thirrje elektoratit të tyre që të votojnë për PS-në në 25 Qershor, Nga ana tjetër sadopak vota në një kohë që Rama ka shpallur idenë e 71 mandateve, do të ishin të vlefshme.
PSV 91 e Petro Koçit, në zgjedhjet e përgjithshme të vitit 2013 mori 6135 vota, ose 0.36 % të tyre në rang kombëtar.
Partia Uniteti Kombëtar e Idajet Beqirit mori 513 vota në të gjithë vendin, ose 0.03% të votave.
Partia Socialiste e Moderuar mori 3119 vota në të gjithë Shqipërinë, ose 0.18% të votës së përgjithshme.
Vetë Gjinushi pas thirrjes së Koçit u shpreh se tashmë kanë përfudnuar të gjitha afatet ligjore dhe se nuk mund të ketë tërheqje. Po ashtu milo deklaroi se ai është i hapur për negociata, por me Kryeministrin Rama dhe jo me Petro Koçin. (E.K/SHUPLAKA)
Discussion about this post