Shoqata e bankave i është drejtuar Bankës Botërore dhe Fondit Monetar Ndërkombëtar për të shprehur shqetësimin lidhur me një vendim të ministrit të drejtësisë Gazmend Bardhi dhe asaj të Financave Helga Vukaj.
Top Channel ka publikuar letrën e shoqatës së Bankave drejtuar këtyre dy institucioneve të rëndësishme ndërkombëtare, ku thuhet që vendimi i dy ministrave dyfishon tarifat e shërbimit përmbarimor .
“Tarifat e reja të larta janë abuzive dhe subjektive për shkak se nuk bazohen në asnjë analizë profesionale”, thuhet në komentet e bankave.
Sipas Shoqatës së Bankave, pagesa e përmbaruesve përbëhet nga dy tarifa. E para është tarifa fikse. Ajo i parapaguhet përmbaruesit ende pa u kryer shërbimi dhe është e pakthyeshme. Ndërsa tarifa e dytë është e lidhur me suksesin e ekzekutimit të pengut.
“Përmes një udhëzimi të beftë, në datën 26 qershor, pra vetëm një ditë pas zgjedhjeve, dy ministrat teknikë të opozitës kanë dyfishuar tarifën e pakthyeshme duke e çuar deri në 10 për qind të vlerës së pronës. ”, shkruan Top Channel. Mirëpo bankat e konsiderojnë të papranueshëm një vendim të tillë.
“Udhëzimi është i papranueshëm dhe tërësisht në kundërshtim me frymën e ligjit dhe përpjekjet e qeverisë për të ulur kreditë e këqija”, thuhet në letrën e bankave. (D.D/Shuplaka)
