Zëvendëskryeministrja Ledina Mandija, e cila do të kryesojë Task-Forcen që do të monitorojë administratën, ka reaguar së fundmi përmes një deklarate për shtyp. Duke iu referuar ligjit për Nënpunësin Civil, ajo ndalet tek çfarë lejohet dhe çfarë nuk lejohet të bëjë nënpunësi civil.
Ajo sqaron se zyrtarët që rrezikojnë shkarkimin janë ata që gjatë orarit të punës marrin pjesë në veprimtari politike apo fushata zgjedhore. Theksohet se atyre nuk u lejohet të bëjnë fushatë për një subjekt politik apo të jenë protagonistë duke manifestuar me pankarta.
Deklaratë për shtyp e Zëvendëskryeministres Ledina Mandija për të drejtat dhe përgjegjësitë e administratës publike
Zëvendëskryeministrja Ledina Mandija, në vijim të deklaratave të këtyre ditëve dhe me qëllim qartësimin e opinionit publik, në referim të legjislacionit në fuqi, veçanërisht nenit 37, të Ligjit nr. 152/2013 “Për nëpunësin civilë” si dhe qëndrimit të Komisionerit për Mbikëqyrjen e Shërbimit Civil, sqaron se nëpunësi civil jashtë orarit zyrtar ka të drejtë të marrë pjesë në veprimtari politike, por nuk i lejohet të shprehë publikisht bindjet dhe preferencat e tij politike. Kjo do të thotë që nuk i lejohet të ndërmarrë veprime të bëjë fushatë për një subjekt politik/zgjedhor apo kandidat, të jetë protagonist në aktivitete/veprimtari politike apo të manifestojë me pankarta, parulla apo çdo mjet tjetër të shkruar dhe të ekspozuar publikisht.
Gjithashtu, sqarojmë që gjatë orarit zyrtar të punës çdo lloj pjesëmarrjeje në veprimtari politike apo fushatë zgjedhore për një parti politike ose kandidat është e ndaluar për çdo punonjës të administratës shtetërore nëpunës civil, administrativ apo me kontratë punë.
Çdo pjesëmarrje në kundërshtim me këto rregulla sjell përgjegjësi penale, sipas ndryshimeve më të fundit të miratuara në Kodin Penal nga Kuvendi i Shqipërisë.
Zëvendëskryeministrja znj. Mandija shpreh besimin e plotë se titullarët e të gjitha institucioneve shtetërore do të marrin masat e nevojshme në përputhje me ligjin, për respektimin e detyrimeve të punonjësve të administratës shtetërore dhe do të procedojnë sipas ligjit për çdo shkelje të evidentuar.
(XH.A/SHUPLAKA)
Discussion about this post