Kreu i grupit socialit parlamentar, Taulant Balla ka votuar sot në Elbasan për delegatët e Kongresit të PS-së, ndërsa është pyetur nga gazetarët dhe në lidhje me zhvillimet e fundit politike në vend, ku protagonist është presidenti Meta në çështjen e ngritjes së Gjykatës Kushtetuese.
Një ditë më parë Presidenti i Republikës u shpreh se Parlamenti mund të shpërndahet me një dekret në kushtet e paligjshmërisë në zbatimin e Kushtetutës. Sot Balla ka refuzuar të komentojë deklaratën e fortë.
“Unë dua ta rezervoj komentin tim sot, vetëm për këtë process tejet demokratik, dhe të rëndësishëm për një parti serioze, e vetmja e tillë sot në vend, Partia Socialiste, me struktura të organizuara, një parti që vazhdon t’i qëndrojë besnikeangazhimit të marrë para shqiptarëve në 25 qershor 2017 dhe në muajt në vijim ne do të vazhdojmë angazhimin tonë edhe me qasje tëreja përkundrejt problematikave të rëndësishme që ka vendi.
Për mua dhe për të gjithë PS-në, propozimi i Kryeministrit për të zhvilluar një betejë, pas asnjë kompromis kundër KÇK-së është detyra jonë kryesore.
Kush do ta bëjë veten pjesë të KÇK-së dhe kush mundohet të kapë e të bllokojë Gjykatën Kushtetuese, është çështje e tyre. Nuk dua të bëj asnjë koment sot për Ilir Metën, i uroj suksese javën e ardhshme në takimin shumë të rëndësishëm që ka me Gaz Bardhin.” ka deklaruar ai jo me pak ironi për nismën e presidentit për të nisur turin e takimeve me partitë opozitare jashtëparlamentare.
