“Të dashur burra duart i keni për t’ia dhënë gruas që të ecin bashkë”, MESAZHI i ndjerë i aktorit kundër dhunës ndaj grave

Ditën e sotme, aktori i njohur i humorit, Gazmend Paja ka qenë i pranishëm në një aktivitet kundër dhunës ndaj grave.

Paja dha një mesazh për të gjithë burrat duke thënë se ata duhet t’i zbukurojnë jetën grave. Ai shprehet se grindje ka kudo, mirëpo kjo nuk do të thotë që problemet të zgjidhen me dhunë.

“Unë jam sot këtu si birri i një nëne, jam si vëllai i një motre, jam si i dashuri i një vajze. Jam mashkull, por tingujt e para i kam dëgjuar nga barku i një femre. Kam gjithçka se një femër më lindi.

Të dashur burra duart i keni për t’ia dhënë gruas që të ecin bashkë. Grushtin mblidheni që të simbolizoni që jeni një dhe gjithmonë bashkë.

Ne jetojmë në Shqipëri dhe jetojmë me burrërinë. Burrat e parë na kanë mësuar se sa paburrëri është të keqtrajtosh femrat. Le të mësojmë nga njëri-tjetri. Mos kemi turp, grindje ka kudo.

Mos harrojmë një gjë, jetën na i dha një grua ndaj kështu e ka vendosur zoti, siç ka vendosur  ne që jemi burra. Kështu që burra, o burra t’ia zbukurojmë jetën qënies së mrekullisë, femrës!”, janë fjalët e Pajës. (D.D/Shuplaka)