Të dashur shumë nga publiku, PSE folësit e njohur zgjodhën të braktisin ekranin

Çdokush që mendon televizionet në Shqipëri, sidomos ndjekësit e moshës 30-40, nuk kanë se si mos ta çojnë mendimin te disa nga njerëzit që kanë dhënë shumë në ekran dhe janë dashur po kaq shumë nga publiku. Te mungesa e gjatë e tyre, për shembull, që s’ka të bëjë me ndonjë ndodhi të shkurtër që mund t’i ketë detyruar të shkëputen.

Ju kujtohet Fjoralba Mishaxhi, Monika Stafa, po Daniela Kostandini?! Ja si ”me shkop magjik”, mund të listojmë pa frikë disa emra që janë dashur shumë dhe që kanë qenë ”fytyrat” e lajmeve, në ekranet që na falnin aq shumë magji dhe kur nuk kishte portale vërdallë.

Pse folësit e njohur i braktisën ekranet?!  A u lodhën apo të tjera rrethana e zgjedhje në jetën e tyre morën përparësi?!

”Shuplaka” sjell më poshtë disa detaje të arsyeve pse hoqen dorë nga puna e një jete dhe magjia e ekranit.

1.Fjoralba Mishaxhi, spikerja ”konservatore” e TV Klan, e thjeshtë, pa shumë stërhollime në transmetimin e lajmeve dhe me një pamje vërtet prej gazetareje. Padyshim që publiku mendonte për lajmin kur dëgjonte Fjoralbën dhe te mendimi ”Sa e thjeshtë dhe sa e mirë është!”. Sot spikerja jeton në Londër me familjen e saj, duke zgjedhur shkëputjen nga TV.

2.Daniela Kostandini, në të njëjtën ”prerje” si Fjoralba, edhe pse shpesh luante me modelet e ngjyrat e flokëve por që nga aftësia e artikulimit dhe transmetimit të lajmeve mund të mendoje vetëm për lajmin. Me përvojë të gjatë, por Daniela zgjodhi shkëputjen nga TV Klan dhe siç mëson ”Shuplaka” ka zgjedhur të punojë te Marrëdhëniet me Publikun në një universitet privat.

3.Monika Stafa, një nga folëset e para të Top Channel, e thjeshtë, e qartë e plot energji pozitive në transmetimin e lajmeve. Kushdo që do ta shihte sot, patjetër që do thoshte ”Spikerja e Topit”, pavarësisht se Monika ka bërë rrugë të gjatë në karrierën e saj jashtë ekranit, duke marrë gradën ”Doktor”, ndërsa ka zgjedhur të shkëputet nga ekrani për të punuar si shefe e Këshillit të Ankesave te Autoriteti i Mediave Audiovizive.

4.Edian Gjoni, spikeri i TV Klan me diksion perfekt e zë karakteristik, tanimë zgjodhi shkëputjen nga ekrani për t’iu dedikuar një tjetër karriere, asaj të PR-it, duke bërë drejtorin e Marketingut në një spital privat.

5.Erjona Shehu, spikerja autoritare, e diksionit perfekt dhe imazhit ndryshuar rrallë, na ka dalë pak nga ideja thelbësore e titullit. Edhe pse Erjona, me profesion mjeke dermatologe, është shkëputur nga ”Top Channel”, ajo sërish ka zgjedhur që një herë në javë të jetë në një studio televizive: atë të TVSH-së në emisionin e pasdites, duke dalë nga korniza e lajmeve.

Të dashur shumë për ne, që kemi jetuar me ta në ekranet e shtëpive dhe që ç’nuk do jepnim t’i dëgjonim edhe njëherë, por  jeta jashtë ekranit me dinamikën e saj, të detyron të zgjedhësh. /Valmora Gogo- Shuplaka

[ngg_images source=”galleries” container_ids=”2865″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]