Presidenti i SHBA-së, Donald Trump, u zotua sot se do të jetë “shumë i vendosur” në qëndrimin e tij për t’i dhënë fund luftës në Gaza , kur të takohet javën e ardhshme me kryeministrin izraelit, Benjamin Netanyahu.
Vërejtjet e presidentit, të bëra gjatë një vizite në një qendër paraburgimi emigrantësh në Florida, erdhën pasi ai tha më parë se shpresonte për një armëpushim në konfliktin gati 21-mujor deri “diku javën e ardhshme”.
Udhëheqësi republikan do të presë Netanyahun në Shtëpinë e Bardhë më 7 korrik dhe zgjidhja e shpejtë e luftës 12-ditore të Izraelit me Iranin ka ringjallur shpresat për një ndalim të luftimeve në Gaza.
Trump u pyet të martën nga gazetarët nëse mund të vendoset një armëpushim para vizitës së Netanyahut.
“Shpresojmë të ndodhë dhe presim që të ndodhë diku javën tjetër”, tha ai përpara se të nisej për në Florida. Trump më parë i ka kërkuar Izraelit të “bëjë marrëveshjen në Gaza”, por në terren, Izraeli ka vazhduar të ndjekë ofensivën e tij në të gjithë territorin palestinez.
