Policia suedeze ka arrestuar një adoleshent pas një sulmi me armë zjarri që ka lënë tre të vdekur në qytetin Uppsala të martën. Sulmuesi thuhet se iku me një skuter pas sulmit në një sallon flokësh në qendër të qytetit, sipas raportimeve në mediat ndërkombëtare.
Policia ka konfirmuar të mërkurën se personi i arrestuar për të shtënat është nën moshën 18-vjeçare. Ndërkohë, të tri viktimat janë të moshës midis 15 dhe 20 vjeç, theksoi policia suedeze në një konferencë shtypi.
Policia po heton mundësinë që vdekjet të kenë lidhje me krimin e bandës, raportojnë mediat suedeze. Suedia është përballur me një valë të krimit të bandave të adoleshentëve në vitet e fundit, me të dyshuar të akuzuar për një sërë veprash, nga vandalizmi e deri në vrasje.
Qeveria suedeze ka propozuar një legjislacion të ri që do të lejojë policinë të përgjojë fëmijët nën moshën 15 vjeç në një përpjekje për të luftuar me këtë problem.
