Largimi i Bledi Shkëmbit nga ambienti bardhekuq duket se ka lënë hapësirën e madhe jo vetëm në fushë, por edhe në brendësi të klubit deri te dhomat e zhveshjes. Dihet qartë tashmë se një person si Shkëmbi ishte motivatori kryesor i ekipit në fushë, por edhe jashtë saj.
Një gjë e tillë shihet qartazi edhe në këto kohë kur ish-kapiteni është larg ekipit, por mjafton prania e tij në vizitat e pakta që i bën ekipit për të rritur disi frymën pozitive dhe për të karikuar lojtarët. Vlerat e padiskutueshme të Shkëmbit si lojtar, por edhe si lider normalisht që nuk mohohen, madje edhe në të kaluarën tifozëria bardhekuqe ka kërkuar që, pas largimit nga futbolli, Shkëmbi të bëhej pjesë e stafit të Skënderbeut.
Një gjë e tillë bëhet vendimtare dhe e nevojshme edhe në këtë moment të vështirë që po kalojnë korçarët. Kërkesat për një gjë të tillë me kalimin e kohës janë shtuar madje edhe në klub, por edhe një pjesë e mirë e lojtarëve kanë hedhur mendimin që Shkëmbi t’i bashkëngjitet Skënderbeut si pjesë e klubit, në staf.
Një gjë e tillë bëhet me dije nga burime të gazetës “Panorama Sport” pranë ekipit si një lëvizje që do të sillte më shumë motivim në radhët e bardhekuqve. Po të njëjtat burime bëjnë me dije se një gjë e tillë ka shkuar edhe në veshin e presidentit të Skënderbeut, Ardjan Takaj, i cili është duke e menduar seriozisht një lëvizje të tillë.
Aftësitë e Shkëmbit në koordinimin e grupit dhe motivim janë të padiskutueshme, por edhe mbështetja që ka ai në dhomat e zhveshjes nga lojtarët që janë shumë të lidhur me të e bëjnë më konkrete këtë mundësi. Por, ajo që bëhet “pengesë” është pozicioni i Bledi Shkëmbit si ndihmëstrajner i kombëtares U-17 të Shqipërisë.
