Kryeministri në detyrë i Kosovës, Ramush Haradinaj dha lajmin se shqiptarët që janë strehuar në Kosovë për shkak të tërmetit janë gati të kthehen në vendin e e tyre.
Përmes një postimi në “Facebook”, Haradinaj deklaroi se tani ka nisur faza e rikthimit dhe për këtë arsye iu bëri thirrje institucioneve që të garantojnë kushte sa më të mira për shqiptarët edhe gjatë udhëtimit.
“Kosova ka hapur dyert dhe zemrat, për t’i strehuar dhe ndihmuar gjithë bashkëkombësit tanë, pas tërmetit me pasoja tragjike që preku Shqipërinë. Tani pas kësaj faze emergjente të përkrahjes dhe akomodimit, ne po hyjmë në një fazë tjetër, të rikthimit të të gjithë banorëve të Shqipërisë në vendlindjen e tyre.
Përkitazi me këtë proces, ne kemi vënë në dispozicion transport për rikthimin e të zhvendosurve, por sot kërkojmë që në këtë etapë të rikthimit vullnetarë të përfshihen edhe të gjitha Komunat, ku ka të strehuar, duke vënë në dispozicion mekanizmat e tyre, numër kontakti, Drejtorit e emergjencave dhe transportin.
Secili qytetar, meriton një kthim të dinjitetshëm dhe Institucionet tona e kanë për obligim, ta garantojnë dhe të respektojnë këtë të drejtë”, tha Haradinaj.
Ai theksoi se zyra e kryeministrit do të vijojë të jetë në gjendje gatishmërie për çdo ndihmë, ndërsa shtoi se të tjera ndihma të mbledhura do të nisen nesër.
“Zyra e Kryeministrit, do të jetë në gjendje gatishmërie për çdo kërkesë eventuale të ndihmës, qoftë për Komunat tona, qoftë për autoritetet shqiptare. Po nesër, të gjitha ndihmat e grumbulluara nga qytetarët tanë në Kazermën e FSK-së në Prizren, do të dërgohen nga Ushtria jonë, në mënyrë institucionale, në depot e rezervave shtetërore të Shqipërisë.
Kosova do të vazhdojë të jetë në gjendje gatishmërie, për çdo ndihmë të kërkuar, për popullin e Shqipërisë”, deklaroi Ramush Haradinaj.
(M. I./ Faxweb.al)
Discussion about this post