Ministri i Shtetit për Diasporën, Pandeli Majko, bëri thirrje në studion e emisionit “Top Talk” në TCH se “Edi Rama dhe Lulzim Basha duhet të ulen jo për të bërë pazar, por për të nxjerrë Shqipërinë nga një qerthull”.
E thënë kjo nga një përfaqësues i lartë i qeverisë, lë të nënkuptohet se marrëveshja e 17 majit të vitit 2017, ka qenë një marrëveshje që në thelb nuk është zgjidhur asgjë konkrete sa i përket aspektit politik, por hedh hije dyshime se ka qenë një tryezë pazaresh midis drejtuesve të dy forvcave politike më të mëdha në vend.
“Në fund fare dikush do të humbasë, por ndonjëherë në politikë humb duke fituar dhe fiton duke humbur”, deklaroi Majko.
Duke folur për aktualitetit politik, Majko theksoi se precedenti që po vendos opozita është i rrezikshëm, dhe ajo duhet të pyes veten se çfarë ndodh pas kësaj: “Çfarë precedenti po hap Shqipëria? Nëse kemi këtë precedent që opozita nuk hyn në zgjedhje për X kryeministër, kthehet në model pastaj. Opozita duhet të pyesë veten se çfarë ndodh pas kësaj. Ja e morën pushtetin. Pas 6 muajsh dorëzojmë ne mandatet dhe themi nuk e duam këtë kryeministër. Mendoj se jemi klasë politike që po mbyll ciklin e vet dhe është e sigurtë që në zgjedhjet që vijnë dikush do të lërë jo vetëm karrigen e politikës. Prandaj është ky polarizim në këtë moment”.
Kur u pyet nëse ka premisa për konflikt social, Majko deklaroi se “këtë e ndajnë njerëzit”, por, sipas tij, “konflikti civil kërkon më shumë sesa 10 mijë njerëz”.
“Në fund të fundit të gjithë kemi fëmijë e mbesa dhe ky është vend ku do të jetojmë të dyja palët. Duhen menduar punët me gjakftohtësi”, deklaroi Majko.
Majko foli edhe për Samitin e Diasporës i cili pritet të mbahet nga data 28 shkurt deri më 2 mars të këtioj viti.
I pyetur nëse do të sjellë diçka konkrete ky event për Shqipërinë, apo do të mbetet në rankun e një samiti honorifik, ministry u përgjigj: “Nëse do të jetë honorifik, atëherë do të jetë samiti i fundit që do të bëhet”, u përgjigj ai, duke theksuar se synimi i këtij Samiti është krejtësisht tjetër.
“Do të ketë një seancë hapje. Më pas do të ketë 4 panele që do të zhvillohen paralelisht, sipas tematikave që kanë të bëjnë me: Arsimin-identitetin: Drejtësinë; Ftesën në shpi që janë turizimi dhe agro-biznesi; dhe me elementë të natyrave të biznesit dhe ekonomisë. Brenda secilit panel do të ketë një debat shumë të gjallë. Por nuk do të mbyllet deri këtu. Për të qenë gjakftohtë kemi kërkuar ndihmën e zyrës së emigracionit të zyrës së Kombeve të Bashkuara, të cilët do të përgatisin dokumentin post-samit. Deri në shtator do të reflektohet rreth këtij dokumenti”, u shpreh Majko.
(F.GJ/FAXWEB.AL)
Discussion about this post