Të shtëna me armë zjarri janë shënuar sot në Tiranë, në afërsi të mbikalimit të Gërdecit. Burime të policisë kanë bërë të ditur se janë njoftuar për të shtënat pas një telefonate që ka mbërritur tek 112-a, numri i emergjencave.
Të njëjtat burime bëjnë të ditur se objekt i sulmit ka qenë një firmë private e prodhimit të inerteve të ndërtimit, ndaj të cilës është qëlluar.
Nga të dhënat paraprake nuk flitet për të lënduar, ndërkohë që policia ka mbërritur në vendngjarje dhe ka nisur hetimin për zbardhjen e saj. Po punohet për kapjen e autorëve të dyshuar të sulmit me armë.
Burime të policisë deklarojnë se nga këqyrja e deritanishme e vendngjarjes, janë gjetur gëzhoja model 56.
Detaje të policisë:
Më datë 03.04.2017, në numrin e emergjencave 112, ka ardhur një telefonat për të shtëna me armë zjarri, në afërsi të mbikalimit të Gërdecit në aksin rrugor Durrës – Tiranë. Menjëherë në drejtim të adresës së dhënë kanë shkuar shërbimet e policisë dhe grupi hetimor.
Nga hetimet paraprake dyshohet se është qëlluar në drejtim të një firme private të prodhimit të inerteve të ndërtimit. Nga të shtënat nuk ka persona të lënduar.
Në vendngjarje janë gjetur dhe sekuestruar në cilësinë e provës materiale 19 gëzhoja model 56. Vijon puna për identifikimin dhe kapjen e autorëve të kësaj vepre penale.
(XH.A/SHUPLAKA)
Discussion about this post