Si pasojë e temperaturave ekstreme janë shënuar disa vatra zjarri në vend, ndërkohë që rreziku vazhdon të mbetet i lartë.
Dy vatrat e zjarrit të shënuara në 24 orë janë ato në Dibër dhe në Lezhë, ku konkretisht janë përfshirë nga zjarri një sipërfaqe me shkurre dhe pisha në Gurë Lurë të Dibrës dhe një sipërfaqe e ngjashme në qytetin e Laçit të qarkut Lezhë.
Emergjencat Civile njoftojnë se vijojnë të mbeten të angazhuara për të përballuar situatën, ndërkohë që paralajmërojnë të tjera rreziqe për shkak të riskut të lartë.
2 vatra zjarri në 24 orë, në Dibër dhe Lezhë
Qarku Dibër
Ne ora 10:00, në fshatin Gurë Lurë, Njësia Administrative Lurë ka rënë zjarr në një sipërfaqe me shkurre dhe pisha. Shërbimi vendor i MZSH Dibër, ka shkuar në vendngjarje dhe ka punuar me mjete rrethanore për shuarjen e zjarrit për shkak të terrenit të thyer malor. Në ndihmë për shuarjen e zjarrit kanë shkuar dhe punonjës nga Agjencia e Zonave të Mbrojtura si dhe banorë të zonës. Pas një pune të gjatë zjarri është shuar. Si pasojë e zjarrit u dogj një sipërfaqe rreth 2 ha me shkurre dhe disa pisha.
Qarku Lezhë
Ne ora 19:30, në qytetin Laç ka rënë zjarr në një sipërfaqe pyjore me shkurre dhe pisha. Shërbimi vendor i MZSH Laç ka shkuar në vendngjarje dhe ka punuar me mjete rrethanore për shuarjen e zjarrit për shkak të terrenit të thyer malor. 60 forca ushtarake kanë shkuar per ndihme në vatrat e flakeve dhe pas një pune të gjatë zjarri është shuar. Si pasojë e zjarrit u dogj një sipërfaqe e konsiderueshme me shkurre dhe pisha. Drejtoria e Përgjithshme e Emergjencave Civile u kërkon të gjithë qytetarëve që në rast se konstatojnë zjarre, të njoftojnë menjëherë në numrat e emergjencave 112, 129, apo në Qendrën Kombëtare Operacionale të Emergjencave Civile në numrin 06941 10 198.
Discussion about this post