Me nisjen e Vitit të Ri dhe buxhetit të ri të 2017-ës insititucionet qëndrore dhe lokale kanë nisur të depozitojnë pranë Agjensisë së Prokurimeve Publike kërkesat për blerje të tyre të vogla. Në faqen e Agjensisë gjenden me dhjetra kërkesa për blerje mallrash apo shërbimesh. Nga një vëzhgim i shpejtë i një portali online bie në sy që shumë insitutucione kanë shfaqur menjëherë kërkesat e tyre.
Bashkia e Mallakastrës e ka marrë shumë seriozisht pastrimin këtë vit. Ajo ka kërkuar të blejë 800 kosha mbeturinash për t’i shpërndarë nëpër qytet dhe vlera maksimale duhet të jetë 800 mijë lekë të reja. Pra 10 mijë lekë për një kosh. Po kështu edhe Policia e Korçës ka kërkuar një ofertë për blerje ushqimi për personat e arrestuar. Sipas policisë shërbimi duhet të jetë për tre muaj dhe vlera është 190 mijë lekë. Njëkohësisht edhe Drejtoria e Kulturës në qytetin e Gjirokastrës ka kërkuar blerjen e shërbimit të ruajtjes së Kalasë së qytetit dhe kalaja duhet të ruhet për 1 muaj me tre roje në ditë dhe vlera e këtij shërbimi sipas saj nuk duhet t’i kalojë 200 mijë lekë.
KESH në ditët e para të Janarit ka kërkuar blerjen e dy kostumeve për polumbarët me vlerë 760 mijë lekë. Ndërsa Agjencia e investimeve të huaja AIDA ka një kërkesë shumë të çuditshme. Ajo kërkon blerjen e një bilete avioni me destinacion Amsterdam-Singapor-Tiranë dhe fituesi pasi të njoftohet me e-mail duhet të paraqitet brenda 10 minutash për të vijuar procedurën. Vlera e kësaj bilete është 135 mijë mije (1 mijë euro). Ndërsa Bashkia e Tiranës në ditën e fundit të 2016 ka kërkuar blerjen e 100 kollarevë për meshkuj dhe 100 shajeve për femra. Vlera e këtyre mallrave sipas Bashkisë së Tiranës duhet të jetë 700 mijë lekë. (J.V/Shuplaka)
Discussion about this post