Tenori me famë botërore Agim Hushi ka sulmuar sot në një shkrim të gjatë të tijin Ministrinë e Kulturës. Sipas tij kjo Ministri ka abuzuar me disa tendera me vlerë qindra milionëshe, ndërkohë që artistët e operas në Shqipëri mezor marin rrogat.
”Do tronditeni kur të lexoni bemat disa mujorëshe, milionat që kalojnë në xhepat e të mësuarve me abuzimet, që do ti publikoj së shpejti. Njerëz të ndershëm më shkruajnë çdo ditë, duke më treguar me fakte, për tendera të Ministrisë së Kulturës; qindramilionëshe, të cilat do t’i shihni të dokumentuara shumë shpejt dhe ti gjykojmë së bashku nëse janë apo jo abuzime me taksat tuaja dhe shkatërrim i kulturës…Ndërkohë që artistët e operas nuk marrin pagat e tyre, që u takojne në fund të vitit”, shkruan tenori.
Hushi duke vazhduar më tej ka hedhur sulme edhe në drejtim të institucionit të Operas dhe Baletit që drejtohet nga Zana Çela, ku thekson faktin që projekti i tij për transformimin e këtij institucioni as nuk u lexua nga autoritetet përkatëse.
”Ju të gjithë e dini se çfarë ndodhi para syve tuaj kur një ish e larguar me ceremoni dhe e njohur për bëmat e saj abuzive, e shkarkuar zyrtarisht për abuzime me fondet, riciklohet zyrtarisht në TOB, ku programi im i jashtëzakonshëm për Operan as u lexua fare nga komosioni i Kumbaros”, vazhdon ai.
Hushi u kthye në Shqipëri me një karrierë të jashtëzakonshme të ndërtuar jashtë vendit, ndërkohë që mendon se në vendin tonë nuk është vlerësuar si duhet.
”Bëhen show me diasporë teksa shqiptarët zënë vendin e parë si azilkërkues nëpër botë.
Miq të dashur, diskutimi juaj këtu do më japi nje shtytje për të marrë vendimin e duhur; këtu me ju apo në Vienë me studentet e mij dhe familjen time, në komfortitetin tim personal”, shkruan Hushi.
Kjo nuk është hera e parë që tenori sulmon Ministrinë e Kulturës, pasi edhe më parë ai kishte hedhur akuza të forta në drejtim të ministres Kumbaro, për festivalin e fundvitit në TVSH. Ai do ta quante ministren Kumbaro ”Dylqinën e Kulturës” që numëron veç suksese dhe po shtron rrugën drejt politikës. (E.K/SHUPLAKA)
