Gazetari sportiv Ervin Baku ka denoncuar një ngjarje të shëmtuar që ka ndodhur dje në stadiumin “Selman Stërmasi”, në përfundim të ndeshjes Partizani-Skënderbeu.
Sipas tij deputeti socialist Erion Braçe, i njohur për tifozerinë e tij ndaj ekipit të Partizanit, ka goditur me çakmak gjykatësin e ndeshjes Andi Koçi.
Ndeshja e djeshme shkatërroi përfundimisht ëndrrat e Partizanit për një vend në kupat e Europës, dhe mesa duket Braçe ka lëshuar nervat mbi arbitrin.
Gazetari shkruan se një deputet duhet të jetë model për shoqërinë, qoftë dhe në shkallët e stadiumit, pavarësisht gjykimeve që mund të ketë në lidhje me vendimet e arbitrit.
Ervin Baku shkruan: Gjesti i shëmtuar i deputetit
TURP! ERJON BRAÇE GODET ME ÇAKMAK ANDI KOÇIN
Sot u luajt ndeshja Partizani – Skënderbeu. Më e rëndësishmja e javes së 30-të të Kategorisë Superiore në futboll. Isha në stadium. Në tribunën e shtypit. Ndeshja përfundoi. Si përfundoi? Fitoi Skënderbeu 0-1. Po kjo për mua nuk ka absolutisht asnjë rëndësi. Si në çdo ndeshje, në tribunë ishte edhe deputeti Erjon Braçe. E respektoj si ligjvënës aktiv, të mirë, të vendit tim.
E respektoj edhe pasionin e tij për futbollin. Por sot deputeti Braçe bëri një gjest të shëmtuar. Shumë të shëmtuar. Në përfundim të ndeshjes goditi me çakmak gjykatësin e ndeshjes Andi Koçi. Si ka mundësi??? Si???
Deputeti duhet të ulë gjakrat e tifozëve të irrituar. Jo të ndezë gjakrat. Nuk më intereson fare si gjykoi Andi Koçi. Fare. Edhe sikur ta ketë bërë “baltë”… Deputeti duhet të jetë “model” për shoqërinë. Kudo. Edhe në stadium. Kushdo qoftë ai. Edhe tifoz i Partizanit.
(E.K/FAXWEB.AL)
Discussion about this post