Kreu i grupit parlamentar të PS-së, Taulant Balla, duke folur në ERTV intervista ka thënë se ndërprerja e seancës së sotme të Kuvendit ndodhi për shkak të sjelljes degraduese të opozitës.
“Z.Spaho kërkoi fjalën për procedurë për një kërkesë , në seancën e 8 shkurtit do ketë interpelancë për kërkesën e Spahos, por ajo ishte një ndërprerje absurde nga PD dhe shtojca LSI, deri më 15 qershor kur të vendoset për negociatat. Nga shtatori i 2017, Kuvendi parlamentar ka hyrë në shinat e respektimit të rregullores. Basha ende nuk ka mësuar se si është rregullorja si deputet i ri që është. Ata duan të prishin seancën me hir a me pahir. Sot diskutohej një projektligj i propozuar nga deputetja e PD, dhe ato prapë e prishin”, tha ai.
Taulant Balla u shpreh edhe për rrëzimin e listave të KLGJ-së e KLP-së që nuk morën votat. Ai tha se kur ka të tillë votime opozita do të sillet në të njëjtën mënyrë pasi nuk e do reformën në drejtësi.
“PD në të gjitha votimet, LSI një herë duke qarë e një herë duke qeshur, nuk ka ardhur. Sa herë të kesh në Kuvend votime për Reformën në Drejtësi, njësoj do i kesh këta. Këta kanë hallin e drejtësisë. Kush i beson këta. Do i japim këtij vendi angazhimin që kemi marrë për të implementuar Reformën në Drejtësi”, tha ai.
Krei I grupit socialist foli edhe për aeroportin e Vlorës ku u shpreh se do të ketë fluks fluturimesh pasi biletat do të jenë më të lira.
“Qytetarët shqiptarë por dhe familjarët tanë që janë jashtë, e dinë se çfarë çmimesh paguhen sot në shërbimin monopol që ofron aeroporti i Rinasit. Me uljen drastike të çmimeve, do kemi më shumë fluturime”, tha ai. (B.H/Faxweb)
Discussion about this post