Tentoi të vriste një person në qendër të qytetit, arrestohet 23-vjeçari

Një 23-vjeçar i shpallur në kërkim si autor i një plagosje me armë zjarri ndodhur më 30 Dhjetor 2018, është vënë në pranga.

E.D. 23 vjeç,  banues në Klos, ndaj të cilit ishte vendosur masa e sigurimit arrest me burg në mungesë, është arrestuar në kuadër të operacionit policor të koduar “Fundi i arratisë”.

“Në vijim të punës për kapjen e personave të shpallur në kërkim si dhe në bazë të informacioneve të marra në rrugë policore, shërbimet e Komisariatit të Policisë Mat në bashkëpunim me DVP Dibër, kanë organizuar dhe finalizuar me sukses operacionin policor të koduar ‘Fundi i arratisë’, duke bërë të mundur lokalizimin dhe  kapjen  e shtetasit: E.D, 23 vjeç,  banues në Klos.

Ky shtetas me datë 30.12.2018, në qytetin e Klosit gjatë një konflikti të çastit,  dyshohet se ka qëlluar me armë zjarri pistoletë në drejtim të shtetasit E.H dhe më pas është larguar.

Për këtë shtetas Prokuroria Pranë Gjykatës së Shkallës së Parë Mat, ka  caktuar masën e sigurisë ‘Arrest në burg’, për veprat penale ‘Prodhimi dhe mbajtje pa leje e armeve luftarake dhe e municonit’, ‘Kanosja’, ‘Prishja e qetësisë publike’, ‘Plagosja e lehtë me dashje’.

Materialet proceduriale do ti referohen Prokurorisë për veprime të mëtejshme”, njoftoi Policia.