Tërheqja e AMA-s, aktivisti: Klientëve të qeverisë iu mbaroi stoku, ja sa është kostoja reale e një dekoderi! (Video)

Ndryshe nga shumë qytetarë që zgjodhën të protestonin vetëm në rrjetet sociale, ose të pranonin në heshtje procesin e dixhitalizimit, Zirkon Disha zgjodhi një formë të veçantë proteste.

Me biçikletën e tij, ai ka çuar pranë zyrave të AMA-s dhe Kuvendit një televizor që deri dje transmetonte, ndërsa sot ishte jashtë funksionit, për shkak të fikjes së transmetimeve analoge.

Sipas aktivistit i gjithë ky proces u bë me qëllim për të avantazhuar kompanitë që tregtojnë dekodera, ndërsa tërheqja e sotme është bërë për shkak të mbarimit të stokut. Sipas Dishës 70% e familjeve nuk kanë pasur dekoder dhe kjo ka bërë që të ketë dyndje në pikat e shitjeve.

“AMA  kishte mundësinë që të informonte qytetarët, ndryshe nga sa thotë. Vendimi i sotëm i AMA-s është korruptiv, pasi dhe në diskutimet që unë kam pasur me njerëzit, kjo ka ardhur për shkak se kompanive kryesore iu kanë mbaruar dekoderat, ju ka mbaruar stoku. 

Prokuroria duhet të nisë hetimet, pasi akti është korruptiv. Unë kam bërë një reagim dhe flitet për një shumë afro 5 milionë euro që iu ka shkuar kompanive që  tregtojnë dekodera.

70 % e familjeve dhe sipas asaj që thotë AMA nuk kanë pasur një dekoder në shtëpitë e tyre. I gjithë ky vendim ka qenë politikë, pasi dhe të zgjedhurit e AMA-s janë te zgjedhur nga ana e partive politike. 

AMA është tërhequr se kjo nuk ka qenë funksionale, shumica e shqiptarëve e kanë të pamundur që të blejnë një dekoder pasi jetojnë në kushtet e varfërisë. Ka qenë një mënyrë e sforcuar për të shtyrë qytetarët që të blejnë dekodera.

Me një kërkim të shpejtë në dyqanet online kostoja reale e një dekoderi është 11-15 dollarë. Janë tre katër kompani që i shesin këto dekodera dhe minimalisht kanalet e TVSH-së duhej që të transmetoheshin falas, pasi është televizioni publik. 

Ajo që ndodhi sot, me mbarimin e dekoderave, bëri që të shtyhej dixhitalizimi për në Janar të 2019-tës. Ne jemi në një situatë të ngjashme me atë që ndodhi te Rruga e Kombit dhe me atë që po ndodh çdo ditë te Teatri Kombëtar. Duhet të kishte një garë të hapur dhe për kompani të tjera të dekoderave”, u shpreh aktivisti.

(E.K/FAXWEB.AL)