Tërheqja e Valdrin Pjetrit, PS nuk dorëzon bashkinë. Cilët janë skenarët!

Diçka është e sigurt, Valdrin Pjetri nuk do t’a qeveris për 4 vitet e ardhshme qytetin më të madh në veri të vendit, dhe këtë e ka bërë me dije vetë kandidati fitues në zgjedhjet e 30 Qershorit.

Por mësohet se Partia Socialiste nuk ka ndërmend të tërhiqet nga Bashkia e Shkodrës pasi me një ndryshim date, konkretisht jo me 21 Gusht por më 19 të të hënës së ardhshme, do të bëhet mbledhja e anëtarëve të rinjë të Këshillit Bashkiak për konstitumin e tij.

Kjo sjell një tjetër zhvillim në Shkodër nëse Këshilli Bashkiak do të konstituohet më datën 19 Gusht, ku përveçse nuk është parë dhe dëgjuar ndonjëherë diçka e tillë, në këto rrethana, pritet Voltana Ademi të qëndrojë në detyrën që ka aktualisht deri në zhvillimet e reja që priten të ndodhin.

Kjo do të thotë gjithashtu se Ademi do të drejtojë një bashki ku shumica dërrmuese e anëtarëve të këshillit do të jetë e majtë.

Tërheqja e Valdrin Pjetrit ka krijuar një tjetër precedent në politikën shqiptare e cila duhet thënë se të paktën përgjatë vitit të fundit, ka ‘dhuruar’ pafund të reja në aspektet proceduriale sa i përket çështjeve që kanë të bëjnë me të zgjedhurit vendor dhe parlamentar, e sidomos në zgjedhjet e 30 Qershorit ku mazharanca u fut e vetme dhe fitoi të gjitha bashkitë e vendit.

Tashmë me sa duket ‘topi’ është sërish në dorën e Presidentit të Republikës, Ilir Meta sepse duhet që ky i fundit të dekretojë një datë për zgjedhje të parakohshme në këtë Bashki.

Por nuk mbaron me kaq, pasi të gjithë e dimë se Meta nuk i ka njohur zgjedhjet e 30 Qershorit, ku duke shmangur sipas tij përplasjen e pashmangshme, anulloi këtë datë dhe pak ditë para saj dekretoi një tjetër, atë të 13 Tetorit të këtij viti.

Kështu, lëvizja e vetme dhe që tashmë është edhe e njohur nga të gjithë është data 13 Tetor, dhe zhvillimi i zgjedhjeve vendore në Shkodër në këtë datë. Por pyetja që përkohësisht mbetet ende pa përgjigje duke pasur parasysh edhe qëndrimet e palëve politike është: A do të ketë zgjedhje vendore të përsëritura vetëm në Shkodër apo në të gjitha bashkitë e vendit? Mbetet për t’u parë!

(F.GJ/FAXWEB.AL)