Pas ankesave të vazhdueshme të banorëve të fshatit Zharrës në Fier, Ministri i Energjisë dhe Industrisë Damian Gjiknuri, ka urdhëruar sot kompaninë “Bankers Petrolium” të ndërpresë urgjentisht operacionet e injektimit me presion të lartë të ujit teknologjik në puset e lokalizuara përreth fshatit, deri në një njoftim të dytë.
Sipas njoftimit zyrtar, Ministria e Energjisë dhe Industrisë shprehet e vendosur për të marrë të gjitha masat e nevojshme për të zgjidhur shqetësimin e shprehur nga banorët e fshatit Zharrës.
Gjiknuri deklaron se me përfaqësuesit e Bankers Petrolium është mbajtur një komunikim i vazhdueshëm për të diskutuar zgjidhjen e problemeve të shfaqura në këtë zonë dhe marrjen e të gjitha masave të nevojshme për ndalimin pa afat të operacioneve të injektimit të ujit me presion të lartë në këto puse nga ana e kompanisë.
Ministri Gjiknuri ka urdhëruar gjithashtu ngritjen me urgjencë të një grupi pune me përbërje nga MEI, AKBN, Albpetrol dhe SHGJSH, në bashkëpunim edhe me IGJEUM për të marrë analizuar situatën dhe për të zgjidhur kërkesën e banorëve të kësaj zone.
Në zbatim të këtij urdhri, grupi i punës i kryesuar nga Zv. Ministri Bejtja zhvilloi një takim të zgjeruar me përfaqësues të komunitetit, përfaqësues të Bashkisë Patos, të Bankers Petroleum, të Albpetrol, AKBN dhe IGJEUM për të diskutuar problemet e ngritura prej komunitetit lokal. (D.D/Shuplaka)
