Pak orë pas ngjarjes së rëndë të ndodhur në Berlin, ku një azilkërkues nga Lindja e Mesme shkaktoi 12 viktima dhe 48 të plagosur në një treg Krishtlindje, ka reaguar Presidenti i Republikës së Shqipërisë, Bujar Nishani.
Në letrën drejtuar homologut të tij gjerman, Joachim Gauck, Kreu i Lartë i Shtetit shpreh ngushëllimet dhe dënon këtë akt çnjerëzor.
Mesazhi i Nishanit
“I nderuar Zoti President,
Akti i mbrëmshëm terrorist në Berlin, që përgjaku Krishtlindjet e këtij viti, më tronditi shumë.
Me trishtim të thellë dhe solidaritet, dëshiroj që përmes jush t’i shpreh ngushëllimet më të ndjera familjarëve dhe të dashurve të viktimave, Qeverisë Federale dhe popullit mik gjerman. Të lënduarve i uroj shërim të shpejtë dhe kthim sa më parë në jetën e tyre normale.
E dënoj me forcën më të madhe këtë akt çnjerëzor dhe në këto momente dhimbje dhe zemërimi, unë dhe populli shqiptar jemi me ju dhe popullin gjerman.
Bujar Nishani”
(XH.A/SHUPLAKA)
