Shefi i Pentagonit, James Mattis, thotë se çdo kërcënim ndaj SHBA-ve ose aleatëve të saj nga Koreja e Veriut, do të ballafaqohet me një “reagim masiv ushtarak”. Këto komente vijnë pas takimit të sigurisë kombëtare me Presidentin amerikan Donald Trump.
Pheniani thotë se ka testuar me sukses një armë më të përparuar bërthamore – një bombë me hidrogjen.
Koreja e Veriut ka sfiduar sanksionet e OKB-së dhe presionin ndërkombëtar për zhvillimin e provave me armë bërthamore të cilat mund të arrijnë SHBA.
Por, duke folur me gazetarët jashtë Shtëpisë së Bardhë, Mattis tha se SHBA ka aftësi për të mbrojtur veten dhe aleatët e saj si Korenë e Jugut dhe Japoninë.
“Çdo kërcënim ndaj Shteteve të Bashkuara ose territoreve të saj – përfshirë Guamin – ose aleatët tanë do të ballafaqohet me një reagim masiv ushtarak, si përgjigje efektive dhe masive”, tha Mattis.
Megjithatë, ai tha se shpresa ishte për denuklearizim.
“sepse ne nuk jemi duke kërkuar për asgjësimin total të një vendi, domethënë Korenë e Veriut”.
Këshilli i Sigurimit i OKB-së do të mbajë një takim urgjent të hënën për të diskutuar një përgjigje ndërkombëtare, sipas misionit të SHBA.
Ndërkohë, Presidenti Trump ka paralajmëruar se Amerika mund të ndalojë tregtinë me çdo vend që ka biznes me Veriun. (B.H/Shuplaka)
Discussion about this post