Që prej nisjes së protestës së opozitës kërkesa kryesore ishte standardi i zgjedhjeve që janë parashikuar të mbahen në 18 qershor. Mospërputhjet mes palëve përsa i përket ndryshimeve në kodin zgjedhor padyshim që janë të thella.
Në fillim opozita e kryesuar nga Partia Demokratike kidhte një kërkesë: votimi dhe numërimi elektronik. Nga ana tjetër mazhoranca e quante të papranueshme këtë kërkesë pasi sipas saj nuk kishte kohë të mjaftueshme deri në mbajtjen e zgjedhjeve në qershor.
Ndërkohë që me kalimin e ditëve nuk ka pasur asnjë afri mes palëve, përveç një deklarate të kryministrit Rama në Kuvend kur tha se numërimi elektronik edhe mund të realizohet.
Ndërkohë që vetëm dje nga lideri demokrat Basha është artikuluar mundësia e shtyrjes së zgjedhjeve. Ai tha se më shumë se kur do të mbahen zgjedhjet e rëndësishme është që ato të zhvillohen sipas standardeve.
“Shurdhëria ndaj zërit të qytetarëve, asgjësimi i reformës zgjedhore dhe kultivimi i drogës rrezikojnë mbajtjen e zgjedhjeve me 18 qershor, edhe sikur sot të kishte një pakt mes palëve politike për një qeveri teknike.
Prandaj nuk është e pamendueshme që për hir të standardeve zgjedhore, të zgjedhjeve të lira dhe të ndershme, të shikohet edhe shtyrja e zgjedhjeve.
Por, për ne, nuk ka rëndësi se kur mbahen zgjedhjet, rëndësi ka si mbahen zgjedhjet. Zgjedhjet duhet të jenë në përputhje me standardet Europiane, të lira dhe të ndershme”, deklaroi Basha.
Ndërkohë që kjo tezë vazhdimisht është kundërshtuar nga mazhoranca duke thënë se Kodi Zgjedhor i tanishëm e garanton cilësinë e zgjedhjes.
Nuk dihet se si do të pritet ky propozim i Bashës nga partitë në qeveri, po shtyrja e zgjedhjeve padyshim që do tiu jepte më shumë kohë partive që të afronin sadopak qëndrimet. (E.K/SHUPLAKA)
