Henri Çili, një nga sipërmarrësit shqiptar që e ka shprehur hapur se Edi Rama meriton një mandat të dytë, ka hedhur sot për publikun një zgjidhje lidhur me protestën 3-ditore të opozitës para zyrës së Kryeministrisë.
Çili, përveçse i favorizuar për reformën në arsim është një lloj ”maxhordomi” i propozimeve në publik të Edi Ramës.
E perifrazuar me pak fjalë, analiza e tij do të thotë se Edi Rama është kryeministër legjitim, por mund të gjendet një zgjidhje: shkarkimi i ministrit Tahiri dhe zëvendësimi me një ministër teknik.
Flakë për flakë Lulzim Basha nga çadra e bardhë para zyrës së Edi Ramës, iu përgjigj Çilit (duke mos e përmendur me emër) dhe duke e thënë hapur se nuk pranojnë ”koka turku”. Madje Basha e komentoi indirekt si sinjal të qeverisë.
Nuk ka dyshim se teza e Çilit s’po bëhet tërësisht pa dijeninë e kryeministrit Rama.
Rama, nëpërmjet Çilit, po përgatit opinionin publik se nuk është ai problemi. Mund të jetë një nga ministrat e tij, Tahiri për shembull, i cili është sulmuar thuajse përditë për mbushjen e Shqipërisë me kanabis.
Bashkëkryetari i koalicionit qeveritar Ilir Meta do të dalë sot në një konferencë për shtyp, jo të posaçme, por me siguri që do t’i përgjigjet pyetjes që gazetarët kanë mbi kërkesat e Bashës për qeverinë teknike dhe shkarkimit të mundshëm të Tahirit.
A po përpiqet Edi Rama nëpërmjet Henri Çilit që të zerojë vlerësimin pozitiv që ka marrë protesta e demokratëve: me qytetarë modelë, që as nuk thyen sende dhe as nuk hodhën gurë?!
Apo po përgatitet për skenarin më të keq për të: në rast se do kemi përshkallëzim të protestës të ”lëshojë” Tahirin?! /SHUPLAKA
Discussion about this post