Ndërkohë që kryeministri Ramush Haradinaj në një intervistë televizive tha se Presidentin Thaçi bashkë me Edi Ramën i kanë bërë presion në Berlin, për ta hequr taksën, Thaçi ka dhënë një version krejt tjetër. Tashmë ai ka ndryshuar krejtësisht qëndrimin e tij, dhe thotë se taksa duhet të mbetet.
Presidenti Hashim Thaci ka thirrur një konferencë për mediat në Aerportin e Prishtinës, menjëherë pas kthimit nga Samiti i Berlinit.
Ai ka thënë se ka pasur një pozicion unik në Berlin për taksën duke hedhur pas deklaratat e bëra më parë se taksa është një masë e cila duhet të rishikohet.
Ndërkohë, Haradinaj tha se vetë Thaçi i ka bërë presion në prani të të gjithë të ftuarve në Berlin, ky i fundit thotë se ka qenë që taksa të mos hiqet.
“Pozicioni i Kosovës ka qenë shumë i qartë. Dialogu mund të vazhdojë i pakushtëzuar. Taksa ka qenë e duhur dhe duhet të mbetët në fuqi”, është shprehur Thaçi para gazetareve.
Ai ka përmendur që taksa është ide e zëvendëskryeministrit Enver Hoxhaj dhe kryeparlamentarit Kadri Veseli kur tha se: “Propozimi i Hoxhajt për 10 për qind dhe 100 për qind i z. Veseli ka qenë i duhur”.
(F.GJ/FAXWEB.AL)
