I pranishëm në Samitin e Komisioneve për Punë të jashtme, presidenti Hashim Thaçi i kërkoi Rusisë që të njohë Kosovën, pasi sipas tij kjo do t’i lehtësonte një barrë edhe Serbisë.
“Për fat të keq Rusia ende vazhdon të vejë veto në Këshillin e Sigurimit për Pavarësinë e Kosovës. Kosovën nuk e pengon raporti i mirë tradicional Rusi-Serbi. Kosova nuk ka asgjë të keqe me Rusinë, ata ishin pjesëmarrës të negociatave në Rambuje, prezent me ushtarë në kuadër të KFOR-it pas luftës, pjesëmarrës në negociatat e Vjenës 2006-2008 për statusin politikë. Rusia tash e 17 vite e ka zyrën ndërlidhëse në Prishtinë”, tha Thaçi.
Këto deklarata, presidenti i Kosovës i bëri përpara eurodeputetëve dhe disa parlamentarëve nga vendet e Europës Juglindore.
Ndërkohë, pas samitit, Thaçi kërkoi të njëjtën gjë nga Spanja. Në një intervistë për agjencinë e lajmeve spanjolle “EFE”, ai bëri një krahasim midis Katalunjës dhe Kosovës.
“Spanja nuk është Serbia e Slobodan Milosheviçit, sikurse Katalunja nuk është Kosova. Nuk ekziston një paralelizëm mes Kosovës dhe Katalunjës. Të mos harrojmë se Serbia ka kryer gjenocid në Kosovë. Ndaj, njohja nga Spanja duhet të ndodhë sa më parë të jetë e mundur, sepse ky do të ishte një vendim i drejtë”, është shprehur Thaçi.
Ndër të tjera, ai është shprehur se ka besim te Spanja, që do ua bëjë më të lehtë, për shkak se janë dy vende mike dhe ndajnë të njëjtat vlera. (D.D/Shuplaka)
Discussion about this post