Presidenti i Kosovës, Hashim Thaçi, ka pritur sot në një takim komandantin Suprem të NATO-s për Evropë, gjeneralin Curtis Scaparrotti.
Presidenti Thaçi me komandantin Suprem,folën edhe për krijimin e ushtrisë së Kosovës, për të cilën Thaçi tha se ajo do të formohet në koordinim të plotë me NATO-n dhe me përfshirjen e të gjitha institucioneve dhe komuniteteve në Kosovë.
Presidenti Thaçi, sipas një komunikate për media, ka theksuar se roli i NATO-s në Kosovë ka qenë përcaktues jo vetëm në ruajtjen e stabilitetit dhe rritjen e sigurisë, por edhe në bashkëpunimin ndërmjet të gjitha komuniteteve.
“Roli juaj në Kosovë, si dhe në rajon është i pazëvendësueshëm. Do të jemi gjithmonë mirënjohës për këtë mbështetje”, ka theksuar Presidenti.
Sipas tij, Kosova ka përfunduar me sukses procesin e zgjedhjeve, të cilat kanë qenë të lira, fer dhe demokratike.
“Tani jemi në proces të krijimit të institucioneve të Kosovës, të cilat do të jenë multietnike dhe me orientim të qartë euroatlantik”, ka thënë presidenti Thaçi.
Thaçi ka theksuar se Kosova është duke punuar që të përmbyll procesin e transformimit të FSK-së në Ushtri të Kosovës.
“Kjo do të ndodh në koordinim të plotë me ju dhe me përfshirjen e të gjitha institucioneve dhe komuniteteve në Kosovë”, ka shtuar ai, njofton Rel.
Gjenerali Scaparroti, i cili njëherësh është dhe Komandanti i Komandës së Shteteve të Bashkuara të Amerikës për Evropë, gjatë këtyre takimeve në Prishtinë po shoqërohet nga komandanti i KFOR-it, Giovanni Fungo.
(B.H/Shuplaka)
