Presidenti i Kosovës, Hashim Thaçi, ka uruar të gjithë qytetarët kosovarë pak përpara se të trokiste Viti i Ri 2017. Në urimin e tij, ai u kushtoi një rëndësi të veçantë të gjithë atyre personave që natën e ndërrimit të viteve do u duhet ta kalonin në krye të detyrës dhe vlerësoi edhe ata ushtarë e diplomatë do të festonin larg familjarëve të tyre.
“Sonte teksa festojmë dhe urojmë njëri-tjetrin, kujtojmë edhe ata që janë në vendet e tyre të punës: policët, zjarrfikësit, mjekët, punëtorët, që kujdesen për ne të festojmë në rehati dhe qetësi. Ata janë heronjtë e sotëm, sepse me shembullin e tyre tregojnë atë për çfarë shteti ynë ka nevojë më së shumti, që secili të kryejë punën e vetë me nder e përgjegjësi. Urime të veçanta edhe ushtarëve të FSK-së dhe diplomatëve tanë që sonte festojnë larg familjeve të tyre”, është shprehur Presidenti i Kosovës.
Në urimin e tij drejtuar bashkëqytetarëve të Kosovës, ai premtoi se do të punojë më shumë në 2017-ën teksa theksoi se viti 2016 ishte një vit mjaft pozitiv: “Të dashur qytetarë, është kënaqësi t’ju drejtohem në natën e fundit të vitit me urimet më të përzemërta për ju dhe familjet tuaja. Viti që po lëmë pas ishte vit i hapjes së mundësive të reja për qytetarët tanë, por edhe i kalitjes me sfidat e shtetit dhe shoqërisë për të ardhmen tonë europiane.” (XH.A/SHUPLAKA)
