Pas deklaratës së kryeministrit Edi Rama se ekziston mundësia e bashkimit të shqipërisë me Kosovën, presidenti kosovar Hashim Thaçi e ka vijuar më tej këtë qëndrim.
Në një intervistë për Radion Europa e Lirë, Thaçi është shprehur: “Natyrisht, atë që e kam thënë edhe në vitin 2013 e them edhe tani, nëse Bashkimi Evropian e mbyll derën për Kosovën, të gjithë shqiptarët në rajon do të jetojnë në një hapësirë të vetme për t’u integruar pastaj tutje në familjen evropiane”, është shprehur Thaçi.
Ndërkohë më tej, presidenti Thaçi ka shtuar se qytetarët kosovarë janë të frustruar me Bashkimin Europian, për shkak të shtyrjes së procesit të liberalizimit të vizave.
“Natyrisht që qytetarët e Kosovës janë të frustruar me Bashkimin Evropian, me ngurtësinë e tyre, me bllokadën e tyre dhe padrejtësinë dhe ndëshkimin që po u bëhet qytetarëve të Kosovës për procesin e liberalizimit të vizave, sepse Kosova ka përmbyllur të gjitha kriteret e nevojshme dhe të domosdoshme dhe krejtësisht me të padrejtë e ka vënë edhe çështjen e demarkacionit”, është shprehur presidenti i Kosovës. (D.D/Shuplaka)
