Pas denoncimit për tharjen e bimëve dekorative dhe thuajse gjithë pemëve të mbjella përgjatë akseve kombëtare në mbarë vendin, vjen i pari reagim nga Autoriteti Rrugor Shqiptar.
Ky autoritet do të kërkojë një ndryshim të kontratave për 4 kompanitë private që kanë fituar tenderat prej më shumë se 120 milionë dollarësh, financim ky i Bankës Botërore, për mirëmbajtjen e rrugëve kombëtare nga veriu në jug.
Megjithatë, nga mijëra pemë që janë tharë përgjatë autostradave nga Tirana në Vlorë, vetëm se nuk janë vaditur, askush nuk mban përgjegjësi për dëmin e shkaktuar.
Kujtojmë se katër kompanitë e mirëmbajtjes kanë fituar në fillim të vitit tenderat e financuar nga Banka Botërore, me afat 5-vjeçar. Këto të fundit nuk dihet nëse do ta pranojnë kërkesën e Autoritetit Rrugor Shqiptar për amendimin e kontratës.
Sakaq, ende nuk është e qartë se si do të zëvendësohen pemët dhe bimët e thara dhe as se kush do t’i japë paratë për to. (D.D/Shuplaka)
