Hendeku midis rajoneve të pasura dhe të varfra të Eurozonës është rritur që pas krizës financiare. Në një artikull të “The Economist” shkruhet se pabarazia rajonale ishte në rënie në vitet para krizës 2007-‘08, por është rritur që atëherë.
Në studim maten të ardhurat mesatare për frymë të rajoneve më të varfra, shprehur si përqindje ndaj të ardhurave të pjesës më të pasur të vendit. Sipas këtyre të dhënave, në Kalabri (rajoni më i varfër i Italisë) raporti i të ardhurve për person krahasuar me Bolzanon (rajoni më i pasur) ishte 45% në vitin 2007. Por, sot është 40%.
Kjo nuk ndodh vetëm me Italinë.Kudo në rajonet e varfra të Eurozonës, është parë një rënie e të ardhurave si në termat absolutë, ashtu dhe në ata relativë. Nga ky përfundim përjashtim përbën vetëm Gjermania, me pjesën lindore ish-komuniste, ku PBB-ja për frymë arrin në 67% të ish-vendeve perëndimore gjermane (Pa Berlinin).
Sipas “The Economist” pjesërisht fajtor për këtë situatë është “Deindustrializimi”. Kjo sepse pjesa më e madhe e 19 anëtarëve të Eurozonës kanë më pak vende pune në industrinë përpunuese se sa në vitin 2008. Punësimi në industrinë përpunuese është i lartë në shumë vende të varfra të Europës, por ka humbur konkurrueshmërinë botërore për shkak të mbivlerësimit të Euros.
