Sulmi ndaj trajnerit të Vllaznisë Ernest Gjoka pak ditë më parë bëri shumë bujë në media, ndërsa indinjoi tifozët e Vllaznisë por edhe qytetarët e Shkodrës. Por duket se Ernest Gjoka dhe ish-trajneri Armando Cungu nuk kanë qenë të vetmit të cilët janë kërcënuar gjatë kohës që kanë qenë të Vllaznia.
Në një prononcim për Eduasportin.com Drejtori i Akademisë së Vllaznisë Alban Hasani tregon shumë më shumë se aq sa ndodhi me Gjokën.
“Më vjen shumë keq për trajneri Gjoka, pasi sulmi ndaj tij na preku të gjithëve. Një turp për qytetin tonë që shquhet për mikpritje. Presionet? E vërtetë, ka presione. Unë si Drejtor i Akademisë kam parë presione nga më të ndryshmet. Kam parë presione me thika, armë dhe madje dhe me ‘bukë goje’, domethënë me kërcënime për vendin e punës.
Më janë larguar trajnerë nga U-19 nga këto presione. Presionet nuk vijnë vetëm nga prindërit, por dhe nga ata me kollare, nga ata që dalin në televizor. Nuk është vetëm faji i mungesës së presidentëve, pasi kjo gjë nuk ndodh vetëm në Shkodër, por dhe në Fier, Tiranë, Korçë, Durrës apo në të gjithë Shqipërinë. Ndryshimi është se presidentët i dalin vetë në krye situatave, ndërsa ne jemi të detyruar t’i përballojmë vetë.
E përsëris që është një problem që ndodh në të gjithë Shqipërinë jo vetëm në Shkodër. Protagonistët? Ish-trajneri i Vllaznisë, Armando Cungu, ka përjetuar një tmerr. Të lexoje mesazhet që ai ka marrë të ikën mendja. Belisha, Plori dhe Nika i kanë përjetuar nga afër”, ka thënë Hasani.
Kujtojmë që trajneri i Vllaznisë Ernest Gjoka u sulmua me thikë nga një person pas seancës stërvitore me Vllazninë në fushën sportive ‘Reshit Rusi’ në Shkodër. Ai arriti të shpëtojë pa asnjë dëmtim. (B.H/Faxweb)
Discussion about this post