Kosova po lufton për të siguruar një vend në fazën finale të “Euro 2020”. Nëse “Dardanët” nuk e sigurojnë këtë gjë përmes renditjes në grupin A eliminator, e kanë mundësinë tjetër përmes “play-off”-it të Ligës së Kombeve.
Mediat serbe, më konkretisht “Informer”, iu ka bërë një thirrje të çmendur lojtarëve serbë të Malit të Zi, që të mos pranojnë të luajnë sonte kundër Kosovës, në sfidën eliminatore, e cila starton prej orës 20:45, në Podgoricë:
“Nëse jeni serbë, nuk duhet të luani kundër Kosovës. Pesë nga lojtarët tanë të Malit të Zi nuk duhet të kenë asnjë dilemë të premten. Serbë, tani tregoni se nderi juaj është më i rëndësishëm se çdo gjë! Trajneri Lubisa Tumbakovic dhe lojtarët e tij, Mirko Ivanic, Filip Stojkovic, Vukan Savicevic, Adam Marusic dhe Marko Simic, kanë lindur në Serbi. Ivanic ka lindur në Backi Jarak, Filip Stojkovic në Cuprija, ndërsa Vukan Savicevic, Adam Marusic dhe Marko Simic në Beograd. Ata të gjithë zgjodhën të luanin për Malin e Zi, sepse mendonin se në kombëtaren e Serbisë nuk do të kishin hapësirë”.
Kjo gazetë serbe është përpjekur të lidhet me lojtarët e Crvena Zvezda, Ivanic dhe Stojkovic, por ata nuk janë përgjigjur në telefon, as përmes mesazheve. E njëjta gjë edhe me Vukan Savicevic, i cili tani luan për Wisla Krakova.
Discussion about this post