Një tjetër viktimë është shënuar së fundmi në vendin tonë si pasojë e thyerjes së akullit të liqenit. Një 12-vjeçar F. Gurakuqi me iniciale që po luante mbi akull së bashku me motrën e tij, E. Gurakuqi 15 vjeçe, kanë rënë brenda pas thyerjes së akullit. Ngjarja ka ndodhur në Mëzez, në zonën e Kasharit.
Fatmirësisht, 15-vjeçari është arritur të nxirret në kohë, ndërkohë që pritet ardhja e polumbarëve për nxjerren e trupit të pajetë të të miturit. Sipas burimeve të policisë, liqeni ishte pjesërisht i ngrirë.
“Më datë 11.01.2017, rreth orës 14:15, në Mëzez, tek Liqeni i Kasharit, kanë rënë 2 fëmijë në liqen, ku është mbytur një fëmijë 12-vjeçar, ndërsa fëmija tjetër 15-vjeçar, është nxjerrë nga liqeni. Priten shërbimet e polumbarve për nxjerrjen e fëmijës nga liqeni. Grupi hetimor po punon për sqarimin e plotë të rrethanave.”, citohet në informacionin paraprak të policisë. Nga hetimet paraprake është mësuar se fëmijët kanë qënë duke luajtur në liqen pasi ka qënë pjesërisht i ngrirë.
12-vjeçari nga Tirana është viktima e dytë e shënuar brenda ditës së sotme si pasojë e thyerjes së akullit në liqen. Një 40-vjeçar, baba i dy fëmijëve humbi jetën sot në Petovë të Fierit pasi u fundos në rezervuar teksa tentonte të ecte në akull. (XH.A/SHUPLAKA)
