Të mësuar me dy muaj pa trafik dhe me një numër të kufizuar makinash në rrugët e kryeqytetit, pamja që të ofron mëngjesin e sotëm Tirana duket vërtet apokaliptike. Në foton e mëposhtme, e cila është shkrepur pak minuta më parë në zonën e Astirit në Tiranë, shihet një numër shumë i madh makinash që kanë dalë në rrugë, ndërsa është krijuar një trafik i dëndur, që të paktën për dy muaj kishim mundur që ta evitonim.
Gjatë ditës së sotme hyjnë në fuqi një sërë masash lehtësuese për qytetarët, ku shtohen dhe qytetet që janë pjesë e zonave të gjelbra, ndërkohë që lejohet dhe transporti ndërqytetas me taksi, jo më shumë se dy pasagjerë nga e njëjta familje.
Tirana pas karantinës strikte, do të na duket një tmerr i vërtetë, të paktën ditët e para, se ne shqiptarët duket se mësohemi lehtë me ndryshimet… Në disa foto të mëparshme, të publikuara dhe nga Faxweb.al shihej një pastrim i ndjeshëm i ajrit në Tiranë, por duket se gjithçka do të marrë fund me ndezjen e motorëve të ekonomisë, dhe rifillimin e punës normale të bizneseve.
