Tirana rrezikon të mos ngjitet në Kategorinë Superiore, klubi s’ka 10 milion lekë të reja

Pavarësisht se Tirana është shpallur kampione e Kategorisë së Parë dhe ka siguruar automatikisht ngjitjen në Kategorinë Superiore, duket se një tjetër çështje ka trazuar ambientin bardheblu.

Klubi i detyrohet 107 milion lekë të vjetra ish-mesfushorit Gjergj Muzaka, të cilat nuk ia ka shlyer ende dhe nëse klubi nuk e kryet këtë gjë brenda dy ditëve atëherë federata do t’iu zbres nga renditja 3 pikë të tjera.

Në njoftimin e federatës më datë 9 Maj, paralajmërimi ishte i qartë: “KF Tirana i jepet një afat përfundimtar prej 15 (pesëmbëdhjetë) ditësh për të shlyer detyrimet financiare ndaj kërkuesit. – Paralajmërohet KF Tirana se në rast dështimi në përmbushjen e detyrimeve financiare do të dënohet sërish me zbritje e 3 (tre) pikëve nga klasifikimi brenda një afati 10 (dhjetë) ditor për shlyerjen e detyrimeve financiare”.

Vetë Muzaka ka konfirmuar për gazetën Panorama Sport se deri tani nuk është kontaktuar nga ndonjë drejtus i klubit lidhur me këtë çështje./Panorama