Deri në shkurt të vitit 2017, Kosova ka edhe një shans të fundit për liberalizimin e vizave.
Ministri i Punëve të Jashtme Enver Hoxhaj, tha se kjo do të ndodhë vetëm nëse Kosova do të votojë marrëveshjen për demarkacionin me Malin e Zi dhe do të rikthehet në të ashtë quajturën “Pakon”, në të cilën momentalisht janë Gjeorgjia dhe Ukraina
Në një intervistë për indeksi.online, Hoxhaj u shpreh se marrëveshje nuk u arrit deri në fund të 2016-ës, kjo më shumë për problem të brendshme sesa të jashtme të Kosovës.
“Qysh para katër vitesh kur ne kemi marrë udhërrëfyesin për mundësinë që qytetarët e Kosovës të udhëtojnë pa viza drejt Evropës, demarkacioni ka qenë një kusht i njohur qoftë për Qeverinë e Kosovës, qoftë për deputetët e Kuvendit të Kosovës. Arsyeja pse nuk kemi mundur ta gëzojmë këtë të drejtë në fund të vitit 2016, ka të bëjë më shumë me rrethanat e brendshme sesa të jashtme. Për mendimin tim është e pakuptimtë se si një pjesë e deputetëve të Kuvendit të Kosovës kanë hezituar që ta votojnë një marrëveshje ndërkombëtare e cila e shënon vijën kufitare aty ku ka qenë historikisht, çdo herë, dhe sipas të cilës Kosova nuk humbë asnjë pjesë të territorit dhe ky është kushti i vetëm i matshëm i cili i ka mbetur Kosovës.
Mirëpo, nëse flasim për atë se a mund ta gëzojnë një të drejtë të tillë Gjeorgjia dhe Ukraina, duhet të them se për Gjeorgjinë Parlamenti Evropian do të mund të vendosë tek në janar se a do të udhëtojnë qytetarët e Gjeorgjisë pa viza. Ndërsa, sa i takon Ukrainës, datë se kur mund të vendos Parlamenti Evropian për këtë shtet është shkurti 2017.
Këta dy muaj janë të rëndësishëm edhe për Kosovën, meqë nëse Parlamenti i Kosovës do ta ratifikonte marrëveshjen për demarkacionin gjatë muajit janar, ne do të kishim mundësi ta zëmë afatin e fundit me qëllim që qoftë Komisioni Evropian, qoftë Parlamenti Evropian të votojnë pro lirisë së lëvizjes për qytetarët e Kosovës.
Përndryshe, viti 2017 është një vit zgjedhor në peizazhin evropian ku dinamikat e zgjedhjeve nacionale do ta formësojnë shumë çdo vendim që mund ta merr Brukseli në raport qoftë me liri të lëvizjes, qoftë me procese të tjera integruese evropiane. ”, ishin fjalët e Hoxhajt. (D.D/Shuplaka)
