Janë shpallur në kërkim edhe dy persona të tjerë lidhur me ekzekutimin në muajin Prill të ish-kryekomisarit Artan Cuku. Burime të grupit hetimor shprehen se 24-vjeçari Mikel Shallari është porositur nga dy persona të tjerë për kryerjen e krimit.
Dyshohet se dy porositësit e ekzekutimit të Cukut ndodhen jashtë Shqipërisë, ndërkohë që emrat e tyre nuk bëhen të ditur për shkak të sekretit hetimor. Burime të rezervuara janë shprehur se dyshohet se njëri prej porositësve është nga Vlora dhe konsiderohet me rrezikshmëri të lartë kriminale. Në 2012-ën, ai është arrestuar nga vetë Artan Cuku në kohën kur ky ishte në krye të Policisë së Vlorës.
Megjithatë nuk përjashtohen as pistat e ngritura deri më tani. Dy vëllezërit Daka, vijojnë të mbahen në vëzhgim. Ata nuk janë marrë në pyetje nga policia, por janë penguar të kalojnë kufirin shtetëror deri në zbardhjen e plotë të ngjarjes.
(XH.A/SHUPLAKA)
