Një ngjarje e rëndë tronditi ditën e djeshme qytetin e Kavajës dhe opinionin publik ku në banesën e shtetases, Marsida Qatja ndodhi një përplasje e ashpër ku mbeti i vdekur Dritan Haxholli nga të shtënat me pistoletën e shërbimit nga oficeri Bledar Toçi.
Mësohet se viktima ka drejtuar kallashnikovin pas konflikteve verbale në drejtim të Toçit, duke e qëlluar me një plumb, por që tragjedia mund të kishte qenë me përmasa më të mëdha nëse nuk do t’i bllokohej arma.
Ndërsa Toçi ka nxjerrë armën e shërbimit duke e qëlluar me breshëri, dhe mësohet se i ka zbrazur të gjithë fishekët që kishte në krëhër.
Dritan Haxholli mbeti i vrarë, pasi kishte shkuar në shtëpinë e ish-të dashurës së tij, Marsida Qatjas, pak pas mesnatës së mbrëmjes së djeshme.
Haxholli u qëllua nga efektivi i policisë Bledar Toçi, me armën e tij të shërbimit, ndërsa mbeti dhe vetë i plagosur në konflikt.
Si ndodhi ngjarja:
1 i vdekur dhe një i plagosur ishte bilanci i një sherri në orët e para të mëngjesit të sotëm në Kavajë, në banesën e një të reje me inicialet M.Q. Mësohet se e reja ka pasur një marrëdhënie me viktimën Dritan Haxholli, shkëputjen e të cilës nuk e kishte pritur aspak mirë ky i fundit që më pas kërcënonte dhe e përndiqte shtetasem M.Q.
“Do të ta nxij jetën”, ky ka qenë një nga mesazhet më të shpeshta të Haxhollit, i cili njihej si person problematik, dhe kishte bërë burg edhe në shtetin grek.
Kjo situatë kërcënimesh është përsëritur dhe mbrëmë, para mesnate ku e reja është detyruar që ta thërresë në banesë Haxhollin me pretendimin për t’u sqaruar, dhe nga ana tjetër kishte kërkuar ndihmën e efektivit të policisë Bledar Toçi, i cili kishte mbërritur në shtëpinë e saj së bashku me armën e shërbimit. Fillimisht u raportua se M.Q dhe Toçi kishin një raport mes tyre, po kjo mbetet ende e pakonfirmuar.
Haxholli dhe Toçi kanë qenë të dy të pajisur me armë, dhe kjo ka bërë që sherri mes të degjenerojë në përdorimin e tyre, ku i pari mbeti i vdekur në vend, ndërsa punonjësi i policisë u transportua në spitalin e Traumës, ku tashmë raportohet që të ketë kaluar rrezikun për jetën.
Shtetasja M.Q ndërkohë është marrë në pyetje nga ana e policisë, për të dhënë dëshminë e saj mbi ngjarjen e rëndë. Nga ana tjetër Toçi është vënë nën mbikqyrjen e policisë në spitalin e Traumës dhe pritet që t’i komunikohet masa e arrestit.
(E.K & F.GJ/ FAXWEB.AL)
