Një ditë pas shpërthimit në Velipojë ku mbetën të plagosur disa persona, drejtori i Shërbimit Zjarrfikës, Alfred Kristuli ka akuzuar Inspektoriatin shtetëror Teknik dhe Industrial, që ka lejuar 1 mijë litra gaz të lëngshëm në një resort turistik.
I ftuar në emisionin ‘Kjo Javë’ të gazetares Nisida Tufa Kristoli tha gjithashtu se shërbimi zjarrfikës ka qenë në vendngjarje për 2 minuta, ndërsa për të shmangur këto ngjarje duhet të merren masa parandaluese.
“Shërbimi zjarrfikës ka qene në vendngjarje për 2 minuta. Zjarri u fik nga personeli që ishte dhe nuk u kërkua ndihmë. Përmasa tjetër ishte tek shpërthimi. Problemi tek gazi i lëngshëm është duke u trajtuar në dy shtylla. Kryesorja janë masat dhe parandalimi si dhe ndërhyrja. ISHTI nuk kishte pse lejonte 1 mijë litra gaz të lëngshëm në një resort. Pra kush janë këto masa parandaluese? Masat parandaluese duhet të respektohen nga kompanitë. Pra janë sinjalizuesit që të njoftojnë për çdo rrjedhje gazi dhe këto sinjalizues gjenden kollaj”, tha Alfred Kristuli.
Ndër të tjera, duke folur për zjarret që kanë ndodhur këtë verë në vend, Kristuli tha se operacionet në Tepelenë, Berat dhe Ibë kanë qenë më të vështirat.
“Shërbimi zjarrfikës nga viti 2015 i është kaluar shërbimeve vendore dhe kjo është një reformë që është bërë në kohën e duhur. Por edhe sensibilizimi i komunitetit ka ndikim. Zjarri më i rrezikshëm nisi në Tepelenë ku janë përqendruar forca edhe nga shërbimi zjarrfikës nga Gjirokastra dhe Përmeti. Po ashtu kemi edhe rastin e zjarrit në Berat dhe në Ibë ku përveç forcave të shërbimit zjarrfikës dhanë ndihmëse edhe forcat e Armatosura”, ishin fjalët e Drejtorit të shërbimit zjarrfikës. (D.D/Shuplaka)
Discussion about this post